الرئيسية / رئيسي / «التزلج على الرمال».. متعة ومغامرة وأشياءُ أخرى

«التزلج على الرمال».. متعة ومغامرة وأشياءُ أخرى

موضوع العدد ده بنهديه للشباب البواسل، عشاق الصحرا والسفر، فى الفترة دى الدماغ بتطلب السفر  للصحرا والـCamping. فى أى رحلة بنطلعها للأماكن دى، لازم نلاقى الـSand boarding موجود فى البرنامج. فقررنا نشوف الرياضة دى قصتها إيه، وبتتمارس إزاى وأخبارها إيه فى مصر

 

فكرة الـSand boarding

مبادئ رياضة الـSand boarding (التزلج على الرمال) هى نفس مبادئ الـSnow Boarding  التزلج على الجليد. اللى صمم فكرتها، كان بيحاول يلاقى بديل قائم على التزلج فى البلاد اللى مافيهاش تلج، وفعلاً صمموا رياضة تزلج على السهول الرملية الناعمة بنفس شكل الـboard  المُستخدم فى الـSnow boarding.

الحلو فى الموضوع أن الرياضة دى مش موسمية لأن التلج له موسم فى البلاد التلجية بس الرمال موجودة على طول، لذلك الرياضة دى مُتاحة طول السنة. فى فترة ما لقوا إن الموضوع مُرهِق جدًا، لأن فى الغرب بيعملوا الـSki lift، وده زى مصاعِد بتطلع الناس لحد قمة الجبل التلجى عشان يتزحلقوا، لكن فى المناطق الصحراوية صعب بناء ما يشابه الـSki lift. فطوّروا الفكرة واستخدموا الـBeach buggy عشان الناس تركبه ويطلعوا بيه لقِمم السهول الرملية، ويبدأوا يمارسوا رياضتهم من غير مجهود لتسلُق القمم دى على رجليهم!

 

أى حِتة فيها سهول رملية ناعمة بتكون صالحة لـSand boarding، ولذلك بنلاقى أبطال عالمية فى اللعبة دى زى الأمريكى Josh Tenge وده بطل العالم أربع مرات، ومتسجّل 3 مرات فى موسوعة Guinness للأرقام القياسية، فى كمان Erik Johnson اللى سجل أسرع تزلج على الرمال بسرعة 82 كم/ ساعة

 

الـEquipment (معدّات اللعبة)

عادة فى حبّة أساسيات لازم تلبسها قبل الـSand boarding من أجل السلامة وتفادى الإصابات. أولًا لازم تلبس خوذة Helmet، وبيُفضّل فوقيها كاب عشان الشمس، تانى حاجة بتكون الـSand board boots ودى جزمة مُخصصة للرياضة دى، ثالثًا Sand board Bindings وده رباط كبير بيتلّف حوالين الجزمة عشان يربطها بلوح التزلج، وأخيرًا لوح التزلج نفسه. بشكل عام بنلاقى إن اللوح المُصَمَم للتزلج على الرمال أقوى (فى صنعه) من اللوح المُصَمَم للتلج على الرغم من الشبه الكبير بين الاتنين. اللوح بيكون مصنوع من البلاستيك المُقوى (Formica) والقاعدة بتاعته مُعالجة بمواد شمعية، بشكل مُعين للتزلج على الرمال بانسياب، فى حالات تانية بنلاقى اللوح كله معمول من الخشب وده للمحترفين. فى ناس بتِستَسهل الموضوع، وتقولك أى سطح أملس وبلاستيك قابِل للتزحلق وده غلط جدًا، لأن لازم قاعدة اللوح تكون ملساء جدًا عشان تتزحلق على الرمل، لذلك أى حاجة تانية هتغرز.. ومش هتتزحلق، كمان ألواح الـsand boarding بتقدّر تتحكم فى اتجاهاتها، لكن أى لوح أو جسم تانى مش هتتحكِم فيه. بنلاقى ناس تانية بتجيب ألواح الـSnow boarding، معتقدين أن مافيش فرق لكن فى الحقيقة ألواح الـsnow boarding بتحتاج رمل مُشبّع بالمياه بعد فترات الأمطار فقط ومش بتتزحلق على الرمال الجافة.

خلّى بالك!

مش كل الأوقات صالحة لـSand boarding، لذلك بيُنصح بممارسة اللعبة الصبح بدرى أو ساعة المغرب، لأن فى فترة الضهرية، بنلاقى أن السهول الرملية بتكون موّلعة ودرجة حرارتها عالية جدًا، يعنى اللى هيقع هيتشوى. كمان فى الفترة الموسمية زى الخريف أو الربيع الرياح بتكون قوية جدًا وساعتها هتتردم رمل.. مش هتتزحلق عليه، لازم كمان تتمرن كويس على technic اللعبة قبل ممارستها، لأن لا قدر الله، الوقعة بتزعل وممكن توصل للكسر كمان

 sandboarding-1 best-one-sandboarding-1sandboarding3

 اللعبة دى إيه أخبارها فى مصر؟

إحنا الحمد لله، وبلا فخر بنمتلك مواقع متسجلة عالميًا كأفضل مواقع لممارسة الـSand boarding. أحلى مواقع هتلاقيها فى بحر الرمال (جنب واحة سيوة)، لذلك هتلاقى فى سيوة مكاتب سفارى كتير جدًا بتقدم الـSand boarding، وكل ما تلّف على المكاتب هتجيب عروض أحسن. فى كمان السهول الرملية فى منطقة القاطنية وهدودة والصفرا فى جنوب سينا، ناحية طابا ودهب وسانت كاترين، بنلاقى كمان مناطق السهول الرملية جنب الفيوم، الظريف فى الموضوع أن فيه كذا Event بيتعملوا بشكل دورى فى مصر وبيكون نشاطهم الأساسى الـSand boarding.

لو بتطلع سفارى وغاوى جو صحرا، دى شوية معلومات سريعة عن الـSand boarding وياريت نقرأ عامةً عن أى رياضة أو منطقة قبل القيام بأى نشاط فيها وده لتجنُب المشاكل، الحوادث وتحوير الناس، فى حالة زى دى مش طالبة حوادث أو توهان الصحرا خااااالص!

عن nada hamouda

شاهد أيضاً

تكريم نجوم دراما وسينما 2017 في مهرجان اوسكار اذاعه الشرق الأوسط

كرمت اذاعه الشرق اﻻوسط مجموعه من صناع وايضا فنانيين ومخرجيين ومؤلفين سينما و  دراما عام …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *