تسافر فين

الغردقة.. إللى متعرفهاش

الغردقة.. إللى متعرفهاش

لو افترضنا إن فيه شلة صُحاب ،قررت تسافر الغردقة بس معهُمش عربية، ولا حاجزين فى أوتيل، ولا يعرفوا أى حاجة خالص. بالنسبة للـ”سوبر جيت” هتلاقى كذا شركة زى “Hi jet” ودى فروعها فى شارع النصر ،أدام نادى السكة، القُللى ورا قسم الأزبكية ،وموقف أحمد حلمى جنب محطة مصر ،وأسعاره بين 65 ج و95 ج ، ورحلاته من 8 الصبح لحد 2:30 الصبح. فيه كمان “Go bus” وده فروعه فى شارع النصر أدام نادى السكة وفى عبد المنعم رياض جنب هيلتون رمسيس،وأسعاره بين 45 ج و 100ج ،ورحلاته من 7:30 الصبح لحد 3:30 الصبح.

بعد ما تختار الرحلة وتتحرك بالسلامة، أرزل كمين هتلاقيه عند بوابات وصول العين السُخنة ،والتانى عند بوابات الغردقة قبل الجونة بشوية، نصيحة يعنى لو شك فيك هتطلع حبة حلوين ،عشان الأمن والظروف الأمنية ،وخصوصاً لو طالع بالليل. “لو معاك حاجه إرميها أسهل يعنى لو طالع بإزازة، خُد معاك الفاتورة بتاعتها ،عشان متتكسرش على دماغك”.
بعد ما توصل بالسلامة ، لو مش معاك عربية، مفيش أكتر من سواقين التاكسى ،ومعظمهم قِناوية، والأجرة بين 10 ج و20 ج و30 ج حسب المكان إللى إنت رايحه،و لو السواق ضايقك هتلاقى على ضهر كل تاكسى رقم للشكاوى، بس متنساش تلقط رقمه.

فى الغردقة هتلاقى أماكن كتير جداً ممكن تأجر منها شقق،فى أحياء مبارك من 1 لـ 5 ودى لطيفة وأسعارها كويسه، فيه كمان شقق نضيفة بس غالية شوية عند “قرية الذهبية”، لو أجرت فى شارع seagull هتبقى فى مكان مميز أوى لإن ده زى وسط البلد، فيه كل حاجة وأحلى قعدات وكافيهات وPubs. فيه كمان أوتيلات صغيرة وكويسة زى Elysees Hotel & Dream beach.
نبدأ رحلتنا الموفقة بالبحر والأنتخة بعد ما تنٌط فى المايوه، فى أول طريق الشيراتون القديم هتلاقى كذا privet beach وأسعارهم بين 50 ج و 100 ج حسب الموسم، أولهم Elysees Hotel & Dream beach وبعده بشويه هتلاقى الـ white beach بس دول مش بيدَخَلوا غير عائلات أو couples عشان لو دخل جروب شباب فى قمة نشاطه الجنسى وجوه فيه روسيات هتبقى معجنة، فيه كمان Papas beach وده موجود فى الـMarina. شعارهم بيدل على خدماتهم Lazy Days and Funky Nights. لو معاك عيلة وأطفال وجروب شباب وعايز يفرهد، إطلع على Titanic aqua park، مدينة ألعاب مائية بس فعلاً انبساط. ممكن كمان تروح الـ Aquarium وتتفرج على أهم الأسماك الموجودة فى البحر الأحمر ،وده بيكون مفيد جداً قبل الـsnorkeling والـDiving عشان تعرف إيه الأنواع الخطر والمسمومة والدخول هناك بيكون رمزى.
أحلى الأكلات والوجبات

بالنسبة للأكل وأنت خارج من الـMarina أمشى شوية فى اتجاه الجامع الكبير إللى هتشوفه أدامك هتلاقى حلقة السمك، عالم تانى للى بيحبوا الأكل، أشهر أنواع “لو نويت تديها فوسفور” الكاليمارى المشوى وده تجربة فى حد ذاته، ونوع تانى اسمه الناجِل وده عبارة عن سمكة كبيرة شوية وطعمها طعم الكابوريا.

لو مبتفهمش فى الأنواع أوى بلاش تجيب سمكة “أم الشعور” ،عشان دى كذا نوع أحلى واحد فيهم اسمه “شعور حُر” بس البياعين بيبيعوا نوع تانى ،وبيضحكوا على الهواة، ولو غاوى ألوان يبقى هات سمك البربون ،وهو”نوع من أنواع سمكة البغبغان”. معظم الأنواع دى بتتعمل صوانى، لو حظك حلو ممكن تتكعبل فى حد بيبيع ستاكوزا طازة، ولو أنت من عُشاق الأماكن إللى بتعبر عن البلد احلى شوربة “sea food” بتعملها مطاعم السمك الشعبية إللى عند المينا فى نفس المنطقة.

لو ملكش فى السمك أوى، إنزل شارع ،”seagull” وادخل من جنب “Metro” يمين فى يمين،واسأل عن مطعم “البيت بيتك” ولو عايز تعمل نمرة قول “مطعم الحاجة”، لإنه معروف بالاسم ده فى الغردقة، المطعم ده من أحلى مطاعم الأكل البيتى ،و لطواجن والمشاوى حاجة كده زى البرنس وأم حسن،نصيحة لو عايز تلحق الكبدة و الطواجن التقيلة، روح قبل 7 بالليل لإن هناك بيعملوا الأصناف فى نفس اليوم ،وإللى يخلص مبيتعملش تانى.

بالنسبة للى بيموتوا فى الأكل الشعبى والسندوتشات “جاد” إللى فى ميدان العروسة ممتاز ،وله فرع تانى فى الممشى السياحى، كمان فى شارع “شيرى” وسط أهل البلد ،وجو قهاوى مصر ومحلات الفطير على كام سوبر ماركت ومحلات موبايلات، بس فى آخر الشارع ده فيه “الفخرانى” يعنى أحلى رز بلبن وأم على وخِلافه مينفعش تروح الغردقة ،ومتعديش على الفخرانى تِحَلى.
تخرج فين بالليل ؟

طيب بلبطنا وأكلنا.. نُخرج فين بالليل؟؟، كتر الكلام فى الموضوع ده. عشان كده هنبدأ بالعائلات. لو عيلة و فيها أعمار مختلفة including عيال صغيرة من إللى بتنام على غفلة أو ناس كبار زى جدو و تيته يبقى تطلع على “Senzo Mall” وده بعيد شويه لإنه فى طريق سفاجا حوالى 20 دقيقة بالعربية. أجمل حاجة إنه فيه كل حاجة، محلات هدوم أعلى Brands وكافيهات وArcade عشان حمادة يلعب وSpineeys عشان فيه ناس بتموت فى العروض والجِبَن. وأنت راجِع خٌد طريق القرى عشان تاخد فكرة بردو عشان لو حابِب تاخد Day use تبقى عارف الـ Hotels.
لو غاوى قعدات وكافيهات وكوتشينة ممكن تروح كذا مكان. نبدأ بطريق الشيراتون القديم ويا سلام على الكافيهات إللى على البحر. بعد ما تعدى فندق الـ Marriot هتلاقى مجموعة كافيهات كويسة وهادية زى “Zookah” مثلاً وده أفضلهم فى الخدمة. لو مشيت أدام شوية هتلاقى Granada Restaurant & Pub وده قعدته فعلاً حلوة وأكله كويس جداً. فيه ناس بتموت فى الزحمة والهيصة دول أنصحهم بالكافيهات إللى فى شارع “seagull” اللى بيتمد من ميدان العروسة لغاية طريق الهضبة. مش هينفع أحدد كافيه معين لإن عددهم كبير جداً. فيه كمان قعدات هادية فى الـ Marina ودول أحسن تروحهم مع صاحبتك أو خطيبتك أو المدام لإن هناك الجورومانسى شويه وأدامك اليخوت مترصصة والجو شاعرى على الآخر. الشارع إللى أدام الـ Marina متمشيش فيه لوحدك بالليل عشان قلق شوية وحاول ما تحُكِش فى حد هناك خصوصاً سواقين التاكسى إللى مفيش أكتر منهم فى الغردقة. طبعاً لو معاك 25 جنيه وعايز تقعد فى حتة إنزل ناحية ميدان الضهار أو شارع شيرى إللى فيهأهل البلد البسيطة والأسعار الرمزية بس متعملش هناك مشاكل عشان ميعملوش معاك الجولاشة. فيه كافيهات فى طريق الهضبة وعند أول كافيه بعد الميناء بشويه إللى بيخدم عليك بنات معظم الكافيهات دى شمال متقعدش هناك عشان البوكس بيخُش بضهره.

لعُشاق السهر والحفلات

أخيراً لعُشاق السهر والحفلات أشهر Club هناك هو “Little Buddah” وأنضفهم بصراحة وده موجود فى آخر الممشى السياحى. مبيدخلش غير couples و حفلاته فعلاً حلوة لو حظك حلو يبقى Dj.Malak إللى بيلعب. متحاولش تدخل لو أنتو شلة شباب عشان متقِلِش بنفسك. بعده على طول تلاقى Papas Beach إللى فى الـ Marina وده حفلاته برضو نضيفة. وفيه كمان Calypso وده فى طريق الهضبة وده آخر Club كويس ومعروف هناك. بعدهم على طول ودول بالنسبة لى 2nd Category هتلاقى Buddah Ramoza وWhite beach والـAqua fun، هتلاقيهم جنب بعض وأنت نازل من طريق شيراتون القديم فى اتجاه شارع Seagull. وتيجى آخر حاجة “عشان محدش يبقى نفسه فى حاجة” الملاهى الليلية وأقدمهم الإمبراطور ،وكام واحد جنب بعض فى طريق الهضبة جنب الكافيهات إللى قولنا عليها من شوية.
الغردقة فعلاً فيها كل حاجة وده جنب منها بس لإن إحنا إتكلمنا على البلد كل إللى فات ده حاجة و الـHotels والـ activities إللى فيها حاجة تانية زى الـDiving والـSnorkeling واليوم إللى ممكن تقضيه فى جزيرة الجفتون، دى بتكون رحلات يومية بتتضمن Snorkeling فى كذا منطقة و بكره على المركب. و فيه كمان السفارى بأسعار مختلفة على حسب طالع Beach buggies ولا عربية وعلى حسب الأماكن البدوية إللى هتوصل ليها، فى الغردقة سهرات، أكل، صحرا، و بحر.. يعنى فعلاً هتتبسط.

مقالات ذات صلة

‫2 تعليقات

  1. انت فاجر وربنا جبت من الاخر بس لو نزلت الارقام تبقي برنس والغردقه ولا شرم اللي احلي