الرئيسية / مطبخ سى السيد / الحلو / طريقة عمل تورتة العروس

طريقة عمل تورتة العروس

نبتدي الأول بعمل الكيكة الإسفنجية
مقادير الكيكة الإسفنجية (لصينية 30 ):
– 12 بيضة (مفصولين البياض عن الصفار).
– 300 جرام سكر مطحون (أوزن السكر الأول، وبعدين أطحنه- السكر الخشن بيهبط الكيكة).
– 400 جرام دقيق منخول مضاف عليه ملعقة نشا كبيرة (النشا بتطري الكيكة).
– فانيليا.
– 6 ملاعق مياه من الحنفية (يضاف على الصفار).
– ملعقه خل كبيرة (يضاف عالبياض).
– باكو بيكنج بودر.
* الطريقة:
– طبعا أستخدام كوب المقياس المدرج وهو أفضل حل بتكون المقادير مظبوطة جدا.
– مرحلة التجهيز أهم من مرحلة الإعداد لأنها بتسهل وتقلل الخطوات وتخليكي تركزي في مراحل ضرب البيض، وأهم حاجة في التجهيز هي إن يبات البيض في الثلاجة قبلها بليلة ويفصل قبل عمل الكيكة تقريبا بساعتين، ويترك ليصل لدرجة حرارة الغرفة.
– نجهز الصينية بدهنها بسمن سايح وفرش ورق زبدة من القعر والجوانب (ورق الزبدة أسهل من رشة الدقيق بضمن بيها إن ما فيش نقطة سمن توصل للكيك وتهبطه، وكمان وهو ده المفيد أسهل فى فصل الكيك عن الصينيه من غير ما حاجة تلزق فى قعر الصينية).
– ينخل السكر البودرة ويقسم لنصفين؛ نصفه يضرب مع الصفار، والنصف الآخر مع البياض.
– ينخل الدقيق والبيكنج باودر بعد وزنه ويمكن إضافة ملعقة نشا وخصم وزنها من الدقيق.
– نضع صفار البيض في وعاء ونخفق بالمضرب الكهربائى على البطيء ثم على السريع ثم نضيف نصف كمية السكر تدريجيا والفانيلا وملاعق الماء الـ6 ونستمر في الخفق لمدة خمس دقائق تقريبا حتي يتضاعف حجمه 3 مرات ويتغير قوامه تماما ليصبح أبيض وكثيفاً جدا جدا كأنه كريمة.

– ضعي الصفار المخفوق في وعاء واسع واغسلي العجانه والمضارب كويس جدا ونشفيهم جامد وابداي في ضرب البياض وأضيفي باقي كمية السكر وستجدين أنه أصبح يكون رغاوي زي الصابون، زودي السرعة الثانية وأضيفي ملعقة صغيرة خل ليثبت القوام ويبيضه أكثر.
– اضربي علي أقصى سرعة وأدخلي الجوانب بملعقة بلاستيك نظيفة وجافة.. استمري في الخفق حتي يتحول لميرانج.
– نضع الميرانغ على جنب، ثم ننخل الدقيق تدريجيا (نصف المقدار أولا ثم النصف الآخر) على صفار البيض ونخلط بواسطة ملعقة خشبية أو بلاستيكية حتى يتجانس الدقيق مع صفار البيض.

– بعد ذلك نضيف الميرانغ (بياض البيض المخفوق بالسكر والمثبت بمعلقة الخل) نصف المقدار أولا ثم النصف الآخر.. ونحرص في هذه المرحلة أن لا نخفق بشدة.. فما نريد عمله هو مزج الخليطين مع بعض.

– قلبي بهدوء.. فالهدف هو خلط المكونين من دون ما نفقد جزيئات الهواء المتجمعة في بياض البيض الذي كلما حافظنا عليه كلما زادت نسبة إسفنجية الكيكة.

– صبي الخليط المتجانس في الصينية المدهونة ووزعيه بالملعقة الخشبية وساويه جيدا.
– أدخليها في الفرن (سبق تسخينه لدرجة 180 لمدة 20 دقيقة قبل الخبز) في المنتصف واقفلي باب الفرن بلطف دون حدوث أي ارتجاج.

– تستوى خلال 40 دقيقة إن شاء الله.

– وده شكلها بعد ما طلعت من الفرن.

– أولا لازم تسيبي الكيكة تبرد شوية قبل ما تشيلي الورق من عليها أو تطلعيها من الصينية، وتتأكدي أصلا إنها استوت جيدا قبل خروجها من الفرن عشان ماتهبطش.
– برديها كويس على منخل سلك وبعدها نقسمها على حسب السمك.. أنا قسمتها 3 طبقات.
* ندخل بقى على المهم طريقة عمل العروسة:
– نحضر بولة استيل أو بيركس ده شكلها.

– على حسب مقاسات البولة حضرت دواير من الورق المقوى متدرجة فى المقاس عشان أقص عليها طبقات الكيكة، وممكن تستعيضي عن دواير الورق المقوى ده باطباق لها نفس المقاسات.. انا حضرت دواير بقطر 10 ,13 ,16 ,22,19 سم.
– بس الدايرة اللى قطرها 22 سم دى طبق مسطوح هيبقى قاعدة التورتة.

– نضع الدواير على طبقات الكيكة.
– ونقصها على مقاسها.
– هنحصل على 5 دواير متدرجة القياس، والباقى طبعا من الكيكة تعملى بيه أحلى بورفيترول أو ترتيفل.

– نبطن البولة بكيس بلاستيك؛ لمنع الالتصاق ونبدأ فى رص الطبقات.

– نبدأ بأصغر طبقة كيك.
– وبعدها كريمة ومكسرات وهكذا لحد آخر طبقة.
– وبعدها نقفل الكيس على آخر طبقة ونضع الطبق المسطوح قاعدة التورتة على آخر طبقة ونضع ثقل عليه “كيس سكر مثلا”.
– وتبات كده فى التلاجة عشان تتماسك وتاخد شكل القالب.
– نشيل بعدها الكيس البلاستيك هنلاقيها بقت شكل القالب بالظبط.
– وبعدها نغطيها بالكريمة.
– ونجيب عروسة ونشيل هدومها ونلفها لحد وسطها بالفويل ونلف شعرها برضه عشان الكريمة ما تبهدلوش، ونعمل خرم للعروسة بالسكينة فى وسط التورتة عشان نحطها فيه.
– وبعدها نكمل زينة التورتة ونعمل فستان العروسة وكل واحدة ومزاجها فى لون وشكل الفستان، أنا عملته بالأبيض والبمبى عشان بنتى بتحب البمبى جدا، وضيفت بودرة جيلى فراولة للكريم شانتيه عشان يدى اللون البمبى وكان مدى طعم الفراولة للكريمة وكان شكلها رقيق قوى.

عن Shereen Ali

شاهد أيضاً

طريقة تحضير الديك الرومي المشوي

كتابة وإعداد: شيرين علي سلام الديك الرومى هو من أشهى الأطباق الرئيسية، وللديك الرومى فوائد …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *