أخباررئيسي

الموضة للجميع.. بيوت الموضة خط احمر

أنا سعيدة جدًا ومنشكحة الصراحة.. إن أخيرًا حد حس بمعاناة الناس فى محاولات المعيشة والظهور على أكمل وجه فى مجتمعاتنا فى ظل ظروف مادية طاحنة!
نفسى تجربة بيوت الموضة و الأزياء العالمية تعمم بجد ..أى نعم لما بتفرج على عروض أزياء كتير بيجيلى تشتت عقلى.. لأنى مش فاهمة هى إيه «الهلاهيل» الملبوسة دى.. على قد ما فرحت من طيبة قلبهم إنهم سمحوا لطبقات المجتمع المختلفة إنهم يكون عندهم فرصة المشاركة فى حاجة كانت محصورة على الطبقات الغنية فقط!

بيوت الموضة أم قلب حنين.. أقنعتنا إن المقطع موضة.. أقنعتنا أن الـ over sizeموضة.. أقنعتنا إن ممكن نلبس صيفى وعليه boots فى درجة حرارة ٤٠ .أقنعتنا إن ممكن نزرع ملوخية فوق عينينا . أقنعتنا إن حواجب اللى شبه رأس الشكوش موضة.. وبتحاول دلوقتى تقنعنا بأن رسمة موج البحر للحواجب والشفايف هى الموضة الجديدة..

دلوقتى بفضل الله تعالى ممكن أى ست تلبس لبس جوزها وتنزل وأى راجل يلبس لبس مراته وينزل والدنيا تمشى زى الفل! خسيت ولبسك كبر عليك أوعى ترميه.. ده موضة تخنت وهدومك صغرت وضاقت عليكى.. عيب ده skinny وstomach.. والحمد لله ميزانية البيت مش محتاجة تضرب فى ٢ عشان يتكسوا.. هى الست تشترى بنطلونات والرجل يشترى القمصان وجزمة لكل شخص وجبرنا الحمد لله..

ده مش كده وبس.. حتى بعد ما كنا كستات بنحتاج نصبغ الجدور كل فترة عشان فرق اللون.. طلعلنا الـ ombre والـ balayage عشان يوفر علينا.. بلاااااااش جدور.. حتى لو الشعر أبيض إنتى بقيتى على الموضة. من كتر ما الموضة بتساعد على ترشيد الاستهلاك واتباع الشريعة الإسلامية الحواجب المنعكشة بقيت موضة .. عايز تلبس منقط على مشجر.. موضة.. يا جماعة ليه بنصعب الموضوع ومش بنبص لنص الكوباية المليان..

يعنى همه يعملكم إيه أكتر من كده.. هلاهيل ولبسونا.. شكانيطة وطقمونا.. منعكشين ونزلونا.. بيوت الموضة تخليت عن مبادئها عشان الشعب يعيش.. وترجع الناس تقول ماحدش حاسس بينا!
لا يا جدعان.. الافترا وحش.. كله إلا بيوت الموضة !بيوت الموضة حضن حنين.. بيوت الموضة خط أحمر !
أمنية

الوسوم

مقالات ذات صلة