أخباررئيسي

اي كلام !

مش هتكلم عن رياضة بعينها أو نوع تمرين مُحدد، لكن أنا عايز أتكلم عن حاجة أخطر بكتير. في الواقع أنا حابِب أتكلم عن الأكل من وجهة نظر واحد هاوي وقرر يمارس تمارين الـfitness بهدف التخسيس والوصول لـshape حلو. العلاقة بين التمارين والأكل علاقة مقدسة وممكن نقول الأكل بيلعب دور رئيسي في العملية زي التمرين بالظبط.

عن تجربة شخصية، أنا نزلت الـGYM والتزمت بتمارين الـfitness  أربع مرات في الأسبوع لمدة نص ساعة يوميًا. التحول كان بطئ جدًا في البداية ولما بدأت private training، ويمكن مكنتش بوصل للأداء المطلوب في الأول بسبب صعوبة بعض التمارين من ناحية وحبي للأكل من ناحية تانية. لذلك كان لازم أوصل لتوازن معين في نوعية الوجبات وعدد الوجبات وتوقيت الوجبات كل يوم. كل وجبة كانت بتتطلّب عناصر غذائية مُعينة.. مع الوقت بدأت أتعود على نوعية الأكل والكمّيات المحددة لكل وجبة ما بين البروتين، الـكربوهيدرات والفيتامينات.. بعد حوالي 4 شهور نجحت في خسارة 12 كيلو، ومن ناحية تانية كنت بدأت أشيل أوزان كويسة نسبيًا في التمرين، عكس ما بدأت. النفسية كانت في السما والثقة بالنفس كانت عالية نظرًا لاختفاء الكرش لأول مرة في الصيف!

الكلام حلو لحد هنا، لكن بعد فترة ماقدرتش أخصص نفس الوقت لـGYM وإحساس الواحد بالذنب تجاه الأكل التقيل والأكل غير الصحي بدأ يقل! والحمد لله شغل 4 شهور اتدمر في شهر ونص! لأني نسيت العلاقة المقدسة بين الأكل والتمارين، ويمكن كنت بروح الـGym مرتين في الأسبوع، لكن ده مامنعش وزني من الزيادة، وفعلًا زدت 7 كيلو في الفترة البسيطة دي. من ناحية التانية الكسل زااااد جدًا والأكتئاب بدأ يظهر ولعلاجه.. الواحد كان بيلجأ للأكل، خصوصًا بالليل مثال: Pizza وsoft drink وفيلم حلو الساعة 12 بالليل. يعني مفيش حاجة أحلى من كده عشان تظبط الـmood. تخيل مع تكرار العملية دي لمدة شهر ونص، زدت 7 كيلو!

بعد ما لاحظت دلدلة اللُغد والكرش مرة تانية، مع العلم إني دقت حلاوة الخسسان والتمرين، كان لازم وقفة مع النفس وتخصيص وقت للتمرين من جديد لأن استمرار الوضع بالمنظر ده حتى لو قللت الأكل أو عملت رجيم مش هتبرز العضلات ولا هتخسس الواحد بقوة التمرين والمواظبة على الرياضة بشكل عام. بعد هذا القرار والعودة الفعلية لـGym، أول أسبوع الموضوع كان صعب جدًا وحسيت إني أول مرة أدخل أتمرن، لا عارف أرفع الأوزان المعتادة ولا عارف أجرى الـtreadmill أكتر من 5 دقايق من غير ما أشحّر.

حتى بعد مرور شهرين على العودة لـGYM، كلمة المدرب لسه بترن في وداني: «اللعبة دي كده، أول ما تسيبها.. هى كمان بتسيبك». العبارة دى بتأكد مبدأ واحد عام، وهو أن الرياضة لازم تكون life style، ولو التزمت بيها لازم تلتزم بالأكل والوجبات، ولازم تحب الشاى الأخضر، وممكن تاخد Fat burner عشان يساعد في العملية شوية. بالنسبالى أهم شىء أن الأكل بشكله الصحي رجع تاني life style بالرغم من الانتكاسة اللي كانت حصلت في شهر ونص مع عرض العواقب والكوارث من وجهة نظر واحد هاوي أو مجرّب!

الوسوم

مقالات ذات صلة