أخباررئيسي

قبل ما تفكر ترتبط أو تشيل مسئولية.. جرّب تربي كلب!

خلينا متفقين إن الموضوع عبارة عن مسئولية من الدرجة الأولى.. إنت مش بتربي حيوان عشان تتسلى، لكن في الواقع إنت بيبقى معاك عيّل صغير -حرفيًا- ومسئول منك مسئولية كاملة.

رحلة التربية بتبدأ من عمر الـ45 يوم وإنت طالع. أشهر حاجة الناس بتربيها بتكون الكلاب والقطط.. ممكن الموضوع يتطور ويوصل للزواحف، الجوارح أو السنوريات بأنواعها! خلينا نركز كلامنا على الكلاب، نظرًا لكونهم الأشهر ما بين الحيوانات الأليفة. كل واحد من الفصيلتين بيندرج تحته أنواع كتيرة جدًا، ولكل نوع أسس في التربية، ونظم للتربية ده غير أحجامهم المختلفة.

صباح الفُل كده، بمجرد ما بتشتري الجرو (45 يوم)، بتلتزم بـكام زيارة للدكتور البيطري عشان التطعيمات الأولية. أهم التطعيمات بتكون للوقاية من الحشرات والديدان والسُعار. بعد أول تطعيم ممكن الكلب يسخّن أو يجيله إسهال وده طبيعي. لازم تستنى لفترة معينة قبل ما تحمّي الكلب -حسب إرشادات الدكتور- وعند دخول البيت معظم الناس بتغلط أشهر غلطة، وهى حبس الكلب في الحمام على أساس أنه لو مزنوق لا مؤاخذة مايوّسخش البيت. للأسف بمجرد ما الجرو بيدخل الحمام، يعتبر ده بيته أو الـcomfort zone، وبيقوم بأي نشاط حيواني برة الحمام، عكس المطلوب.

لازم تعامِل الكلب على إنه طفل، وماتتوقعش إنه يتعلم أي حاجة قبل ما يتم 3 شهور. يعني مشكلة الحمام والأكل والشُرب بتفضل قائمة لحد ما الكلب يكبر شوية. أسس تعليم الكلب أي حاجة قائمة على فكرة الثواب والعقاب.. يعني لو عمل toilette بره المكان المخصص، لازم تعنّفه وتفهمه إنه عمل حاجة غلط، بس من غير ما تضربه، وبعد كده تاخده تحبسه في المكان اللي عايزه يعمِل فيه toilette بعد كده.

البعض بيرجّح عامِل مساعد وهو مسح المكان بمادة ريحتها نفّاذة زي المطهرات بأنواعها ووضع جزء من فضلات الكلب في المكان المحدد زي الحمام مثلًا. مع تكرار العملية دي، الكلب لما هيشمشم بره الحمام، في المكان اللي عمل فيه toilette قبل كده مش هيلقط أي ريحة نتيجة استعمال المُطهّر، ومن ناحية تانية الريحة هتبقى طالعة من الحمام، وبالتالي هيروح الحمام. لو الكلب عمل كده، لازم تكافئه وتبيّن له إنك مبسوط منه. أشهر مكافأة للكلب بتكون الـtreats، وهى أنواع مخصصة من أكل الكلاب ومعروفة بالاسم ده في محلات الحيوانات الأليفة.

مش غلط أبدًا تضربه وتزعقله لو عمل حاجة غلط زي الغشامة أثناء اللعب والعضّ بشراسة أو الوقوف بإلحاح ساعة الأكل بهدف إنك تديله من أكلك. هنا بيتم استخدام حاجة من الاتنين، لو الكلب لسه صغير وبيسنّن، لازم تشتريله عضّاضة أو عظمة كالسيوم وفي الحالتين ده هيساعده في الفترة دي وهيلهيه عن تقطيع القماش (زى الستاير أو السجاد) والجِزم وما شابه ذلك من مقتنيات البيت، اللي بتتبهدل طبعًا. تاني حاجة ساعة الأكل لازم تزعقله، ولو لزم الأمر تضربه عشان يفهم إن الـattitude ده مرفوض وبكده هيتعلم مع الوقت إيه المسموح وإيه الغير مسموح.

نفتكر ديمًا إن شراء حيوان وتربيته بيعلم الواحد المسئولية وأصول التربية، لذلك عمرك ما تشتري أي حيوان أليف من غير ما تكون مُستعد.. ببساطة قبل ما تفكر ترتبط أو تشيل مسئولية.. جرّب تربي كلب!

مقالات ذات صلة