أخبار

كل سنة وكل أم مخلفتش طيبة

أم ومخلفتش
إيه ده؟؟؟؟
ايوة طبعا الأمومة ربنا خلقها جوانا كلنا اللي خلفت واللي ربنا مقسملهاش بالخلفه وطبعا مع دخول عيد الأم علينا بنحن اننا نكون زى كل الأمهات في المناسبة دي وزى م اليتيم في اليوم ده بيحزن احنا كمان بلاش نقول بنحزن لا هقول بنحن للأمومة اكتر لكن لا اجمدي كده احنا كلنا أمهات واحلى امهات كمان إحنا الأمهات الرايقه اللي العيل من دول بيسيب مامته وياخد من حنيتنا احنا ومشاعرنا الفياضة
دايما في الافلام والمسلسلات يصوروا اللي مخلفتش دي انها ناقمة وحاقدة على اللي خلفو وكارهين الأطفال وناقص يولعوا في روحهم ولكن بتجربتي وتجربة ناس حواليا نفس ظروفي لا والله الحمد لله بفضل ربنا بس كل حاجة عادية وفيضان مشاعرنا مغرق كل الاطفال اللي حوالينا ومش هعمل قديسة طبعا اكيد في فترات الواحد بيضعف فيها وأكيد في اول سنين للجواز الواحد حزن وعيط وكانت مواقف كتير بتأثر فيه وكان حساس لكل حركة بتصدر من اللي حواليه بس ربنا بيقوي وبيصبر ولو انتي مخلفتيش وصحتك كويسة وحاسة انك برضة حزينة تعالي وانا اقولك اني كنت زيك معنديش اطفال وصحتي كويسة ومش حاسة بالنعمة دى لحد هوووب ماربنا اراد يوريني اد ايه انا في نعمة كبيرة
ياحبيبى ياالله
ومن كتر العمليات والمنشطات ومحاولات الحقن والحاجات اللذيذة اللي كلنا عارفينها دي انتشرت عندي اورام الحمد لله ليفية واكياس كتير عملوا حفلة على الرحم عندي والحوض كله وبدل بس مكنت بتمنى طفل بقيت بتمنى ربنا يرفع عني الأذى ده اللي بقى يسببلي ألم ومضطرة اخد مانع حمل باقي حياتي
شفتي بقى نعمة الصحة جمب ان مفيش طفل عظيمة ازاى ربنا ميكتب وجع ولا ألم على حد أبدا
بس أحنا جامدين اووووى على فكرة
الف حمد وشكر ليك يارب
احنا في نعمه
وشوفي الأم اللي فرحت بالأمومة ربنا جعل الجنة تحت قدميها ما بالك ربنا هيكافئنا بإية لحرماننا من النعمة دى من غير ميكون لينا اى ارادة في ده
أيوة انتي أم لأطفال اخواتك , قرايبك, جيرانك, حتى اى بيبي في الشارع بتبصيله يضحكلك
أيوة انتي ام لزوجك اللي اخد لوحدة كل الحنية اللي كنتي هتديها لأبنه وبنته
أيوة انتي أم لإخواتك اللي بيعوضوكي دايما انك أمهم التانيه وحنيتك مدفياهم
أيوة إنتي ام بطبعك بغريزتك ربنا خلقك كده
اوعي تحسي في اليومين دول إنك مش أم إنتي أم مسكرة وعسل وربنا يفرحنا يارب في الاخرة بضمة طفل لينا
وربنا يارب يبارك لكل ام في اولادها ويخليلنا امهاتنا وكل سنة وكل ام بخير
خلفت
او مخلفتش

الوسوم

مقالات ذات صلة