أخباررئيسي

15 سؤال نسألهم لنفسنا قبل ما ندخل دنيا

قرار الجواز هو أهم قرار هاتاخده في حياتك، بيترتب عليه جزء كبير من مستقبلك، أو لحسن الحظ لبقية حياتك ،هايترتب عليه بناء الأسرة اللي أنت بتتمناها،وكمان حياتك العاطفية، والاجتماعية، والمادية، و….

قرار زى ده لازم تكون متأكد منه، ومستريح له تماما، والتأكد هنا مش شرط يكون دليل ملموس، ممكن جدا ،وغالبا بيكون احساسك الشخصي بغض النظر عن أى حاجة أو ظروف تانية،وعلشان تقدر تتأكد ممكن تسأل نفسك شوية أسئلة، أنا قدرت أجمع 15 سؤال، لو أنت لقيت أسئلة تانية أسألها، المهم إنك تكون صريح مع نفسك لأقصى درجة، مش هاينفع تضحك على نفسك، وماينفعش تجمل الحقيقة لنفسك تحت أى ظرف.

1-هو أنت جاهز للجواز؟
كتير من الناس بتفكر اذا كانوا جاهزين ماديا ولا لأ، وممكن جدا ينسوا يفكروا اذا كانوا جاهزين نفسيا ولا لأ، مع انه سؤال أهم بكتير.
جاهز نفسيا يعني فاهم المسؤوليات اللي هاتبقى عليك ولا لأ، مهيأ نفسك للتغيير اللي هايحصل، ولا فاكر أن كل حاجة بتفضل زى ماهى؟
هل تقدر تتخيل أنك تكمل مع نفس شريك/شريكة حياتك لمدة 40 سنة مثلا؟

2-انت بتتجوز ليه؟
سؤال غريب ؟!!
كام واحد اتجوز لمجرد إنه يرضي أهله أو صحابه وفي الاخر ماحدش قدر يساعده لما لبس.
كام واحد اتجوز لمجرد إنه فاكر إنه بيكمل نص دينه، وفي الاخر لقى نفسه بيفقد النص الأولاني.
كام واحده اتجوزت علشان “ضل راجل ولا ضل حيطه”، واكتشفت بعد كده أن ضل الحيطة ارحم من ضل راجل غلط.
كل الأسباب دى موجودة في دماغك، ممكن تكون مش ظاهرة بس أكيد ليها تأثير كبيرعلى قرارك.
فكر إذا كنت بتتجوز لمجرد الجواز ، ولا بجد حسيت إنك لقيت نصك التاني؟

3-هل إنت متأكد انك تعرف شريك/ شريكة حياتك كويس؟
طبعا مافيش طريقة معينة هاتقدر تعرف بيها كل حاجة، بس على الاقل مايبقاش فيه سؤال نفسك تسأله، ومتسألوش وتعرف إجابته بعد الجواز وتزعل.

4- هل إنت حر في حياتك؟
حر بمعنى: هل إنت مستقل في حياتك، معتمد على نفسك نفسيا وماديا بشكل عام ،ولا بتضطر تعتمد على شخص/أشخاص معينة لحل مشاكلك؟

5- هل انت حر في اختيارك؟
بتختلف حياة وظروف كل شخص عن شخص، ممكن شخص يبقى عنده ظروف مادية/ إجتماعية/ عاطفية/ جنسية/ نفسية/ …. تخليه ياخد قرار الجواز للهروب من الضغوط دي، بس الحقيقة إن دا حتى مش هروب، دا استسلام لغاية ما يجي عليك الوقت ويبقى مضطر،انه ياخد قرارات مصيرية في وقت هو مش جاهز فيه.

6- هل شريك/ شريكة حياتك حرة في حياتها وقراراتها؟
لو أنت مستقل في حياتك مثلا، هايبقى صعب شوية إنك تعيش مع واحده مثلا بتاخد كل كلامها من اصحابها أو أهلها لازم تعرف درجة استقلالية الشخص اللي المفروض، تكمل معاه بقية حياتك وتشوف إذا كان دا متناسب معاك ولا لأ

7-ايه هو الحلم/الهدف المشترك بينكم؟
أكيد انت عندك حلم أو هدف عايز توصله أو حتى شكل حياة عايز تعيشها، وانت حسيت إن الشخص دا هو/هى أنسب واحد لتحقيق حلمك

ناس كتير بتفترض إنهم عارفين أحلام الطرف التاني من غير مايتأكدوا، فبالتالي بيفترضوا أن الطرف التاني كمان عارف أحلامهم.

8-هل إنت شاركت حلمك مع الطرف التاني؟ هل عرفت حلمهم؟ هل اتفقتوا على حلم يناسبكوا انتوا الاتنين؟ اتفقتوا على الطريق اللي هاتمشوه مع بعض؟
ايه نقط الاتفاق والاختلاف ما بينكم؟
ايه اللي انتوا متفقين عليه، وهاتعملوه ازاى؟
ايه الاختلافات مابينكم، هل بتكملكوا ولا بتبعدكوا؟ هاتقدروا تعيشوا بيها ولا هاتتفقوا تغيروها ازاى؟

9- ايه مبدأ الخلاف بينكم؟
لما بتحاولوا تحلوا مشكلة مع بعض، هل لازم رأى ينتصر على رأى، ولا بتحاولوا دايما توصلوا لحلول ترضيكوا انتوا الاتنين؟
مبدا المنافسه يعني لازم يبقى فيه كسبان وخسران ودا بيصعب الجواز جدا.

10-هل هاتقدروا تكملوا الجواز لو ما خلفتوش؟
حالات التأخر او عدم الانجاب موجوده وبتحصل كتير، مابتتعرفش عادة الا بعد الجواز، هل لو دا حصل هاتفضل سعيد برضه في حياتك مع شريك(ة) حياتك؟
بالرغم من إن الاولاد نعمة، وسبب من أسباب السعادة، إلا أن فيه ناس مقتنعه إن حتى لو ربنا ما اردش ، فمجرد وجودهم في حياة بعض سبب كافي جدا للسعادة.

11-بتتعاملوا مع بعض ازاى؟
– هل بتبقى على طبيعتك وأنت معاه، ولا بتضطر تقول أو تعمل حاجات لمجرد ترضيه؟
– هل الطرف التاني بيبقى على طبيعته وهو معاك؟ ولا بيضطر يقول أو يعمل حاجات لمجرد إنه يرضيك؟
– هل هو متقبلك على طبيعتك ولا دايما عايز يغير فيك أكتر من اللازم؟
– هل انت متقبله على طبيعته، ولا دايما عايز تغير فيه اكتر من اللازم؟
12- داخل الجواز عشان تجمع منه ولا معاه؟
انت بتتجوز علشان تجمع فلوس، منصب، مركز إجتماعى، ….
ولا بتتجوز علشان تجمع معاه ذكريات حلوة، وتبني معاه حياة أحلى.
بعد ماتجاوب، اسأل نفسك هو الطرف التاني بيتجوزك ليه، فيه سبب معين ولا لنفس اسبابك؟

13-شايفين بعض ازاى؟
هل إنت شايفها عروسة مناسبة او انتي شايفاه عريس مناسب؟
العريس أو العروسة شغلتهم انهم يجهزوا نفسهم للفرح
كل تفكيرهم ازاى يتشيكوا ،ويتزوقوا علشان يجهزوا نفسهم لما الناس تشوفهم ،بعد الفرح ماباقش هو عريس لا هى عروسة
هايبقوا 2 بنى اّدمين على طبيعتهم.
يبقى ماينفعش تدوروا على “عروسة” مناسبة او “عريس” مناسب، دور على الشخص اللي بيكملك مش اللي بيجملك قدام الناس.

14-هل انت تستاهل احسن من كده؟
ناس كتير بتبقى مخلصة في حبها للطرف التاني بس الطرف التاني مش مقدر الاخلاص والحب دا، وبيتعامل معاهم على انهم واجبات ، مش حاجة انت بتعملها علشان انت عايز كده، ولو دي الحالة يبقى طبيعي إن الطرف التاني مش هايبادلك نفس الشعور.
السؤال هنا: هل إنت مستعد انك تكمل بقية حياتك مع شخص مابيعاملكش زى ماتستحق، وشايف انك تستحق احسن من كده؟
ماتقللش من قدر نفسك علشان خاطر حد.

15-مرتاح للقرار؟
غريزتك هى احسن حد في الدنيا يديك النصيحة، صدق نفسك وصدق غريزتك لأن هى الصح.

*في الاخر دي تجارب إنسانية، مافيش صح مطلق ولا غلط مطلق .. كل حاجة نسبية من وجهة نظرك.
شوف ايه اللي يقدر يفيدك في حياتك فعلا واعمله، ممكن كل حاجة تبقى غير منطقية، والجواز يمشى زى الفل ،وممكن كل حاجة بتقول انه هايبقى جواز ناجح ويفشل في وقت قصير جدا.
حاتم زكي
مدرب فن إدارة الحياة

الوسوم

مقالات ذات صلة